tveyeini

Tveyeini er eitt nýtt verk, ið viðgerð evnini longsul, tráan og nærveru.

Ein duett koreograferað og framførd av Rannvá G. Niclasen og Vár B. Árting.

​

Duettin varð frumsýnd sum partur av tvísýningini MINNISBROT, í Norðurlandahúsinum 12. august 2023.

​

Upprunaliga vóru RIVA eftir umbøn frá Urd Johannesen umbiðin at skapa eitt verk í samband við stuðulstiltak fyri Beran, ið skuldi vísast sum filmsbrot á KvF. Soleiðis byrjaði menningin av verkinum tveyeini. Arbeitt varð við tematikkum so sum nærleika, longsul, at missa ein kæran og at spæla við sambandið millum tveir kroppar, at varðveita sambandið og hvat hendir, tá sambandið slítist.

​

Tveir kroppar renna saman í rørslu á eini ferð gjøgnum minnisbrot. Í einum mótspæli millum gerandisligan kropsburð, óítøkiligar og  útinnandi rørslumyndir, verður veruleikin skeiklaður og ein nýggjur alheimur skapast, ið speglar tað menniskjaliga og kensluliga litbrotið, ið evnini viðgera. Ljóðmyndin er grundað á nýggju útgávuna hjá tónleikabólkinum Klingra: “...eftir”.

​

Verkið dregur teg við sær inn í eina viðkvæma bløðru saman við dansarunum og eggjar áskoðaran til at hava álit á egið hugflog og kenslur, at á sín egna hátt tulka sambandið millum kropparnar og sjálvi finna fram til hvør søgan er teirra millum.

​

Menningin av tveyeini sum eitt heildarverk, byrjaði í samstarv við íslendska Dansverkstæðið, ið veitti RIVA hølir til eitt dansitilhald 3.-14. apríl, ið samstundis samansjóðaði íslendska og føroyska dansiumhvørvið. Tilhaldið varð stuðlað av Nordisk Kulturfond.